【迎英生活-教育篇】| Outstanding School 就等於 Band 1﹖

【迎英生活-教育篇】| Outstanding School 就等於 Band 1﹖

  • Reading time:1 min(s) read

上個禮拜嘅webinar都有講到英國點揀學校,喺香港我哋會以 Band 1、Band 2 去為學校評級,喺英國就可以參考 Office for Standard in Education 嘅報告,亦即係 Ofsted Report。Ofsted 會對所有公立、小部分私立學校嘅教育質量進行每 5 年一次嘅定期審查,而佢哋嘅總評分有 4 個等級,分別為 Outstanding、Good、Requires Improvement 及 Inadequate。評分標準唔係只計算學生嘅成績,重會計算埋學校嘅領導及管理表現、學生行為舉止及安全以及教學質素。

Ofsted Report 嘅評級方法聽落幾全面,但 Outstanding 評級其實唔係揀學校嘅唯一準則。首先呢一套標準分級已經太舊,難以完全反映現今嘅教育環境;另外呢個分級亦都太廣,即使同樣係 Outstanding 級別,實際質素差異可能好大。所以揀選 Outstanding 學校只係第一步,家長之後應該要認清自己嘅期望,假若希望小朋友學業為重,就可以去睇返學校各自每年公佈嘅成績數據;如果想小朋友喺運動、興趣方面都得到平衡發展,就可以從舊生口中略知一二,或者聽下唔同家長嘅意見,揀選口碑好嘅學校。不過,家長最好都係喺選定學校之前,親身到學校參觀,親身感受校園氣氛。

英國學校有公立、私立之分,而公立學校學費全免,自然多人爭。英國公立小學嘅派位準則最看重嘅係住得近。所以如果你已經有心儀學校,最好就搬到最近學校嘅地區,自然有較高機會入讀。但新移民要考慮埋心儀嘅學校嘅目標班級重有冇空位,如果嗰一級已滿咗,自然唔可以畀你小朋友入讀,所以一定要預先向學校查詢,免得到時撲場空。

中學除咗公立之後,重加多咗一種學校叫 Grammar School。同樣都係公立中學,但 Grammar School 就需要小朋友 Year 6 嘅時候去參加一個叫 11+ 嘅評分試,只有考得好兼住得近先有機會入讀,所以家長喺選擇居住地時,最好考慮埋呢個因素。