香港人不嬲都熱愛工作，我哋呢個冇工開就冇安全感嘅民族，搵唔到工可以話係移民嘅最大隱憂。你可能聽過人講英國難搵工，但每人情況唔同，如果堅持要喺英國搵返同香港一樣嘅人工，就未必有咁理想。 人到異地，要做足心理準備未必能夠做返原本嗰行，又或者薪金待遇維持唔到一貫水平。建議喺真正移民前，做足資料搜集，了解一下你行業嘅平均薪酬，對於第日喺 CV 上填寫預期薪金都有幫助。
要緊貼最真實嘅英國求職狀況，參考英國一啲大型求職網站如 Indeed、Cvlibrary、Totaljobs 等就係最方便快捷嘅做法。如果你目標係想做返老本行，就只需要搜尋相關行業空缺，就可以一目了然睇到你嘅技能喺英國需求大唔大。你亦可以到英國政府網頁上參考「Shortage Occupation List」，了解自己嘅技能吃唔吃香。另外，求職網站可以幫你過濾不同地區嘅空缺，以 Cambridge 為例，區內有從 1970年建成嘅 Cambridge Science Park，係歐洲歷史最悠久、規模最大嘅商業研發中心，過百間大企業如 Bayer 及 Toshiba都喺 Cambridge Science Park 設有辦公室。假若你嘅專業正正係生物科技、開發或研究，Cambridge 絕對喺你嘅首選落腳地。重有 Cambridge Business Park，有 17 個主要以 IT 為主嘅企業如Qualcomm 都喺呢度設有分部，只要你擁有相關嘅學歷同經驗，求職唔係想像中咁困難。
倫敦作為國際金融城市，從事金融、地產、餐飲、管理等國際化行業嘅朋友都唔使太過擔心，加上香港人識中文，可以招待華人商人或遊客，已經係一種優勢。講到最尾，無論你有邊一種技能，只要你嘅心態正確，能夠接受轉行、成為藍領或降低薪酬要求，肯拼搏肯堅持，搵到工只係時間問題，密密 send CV 之餘唔好畀自己太大壓力，學習享受英國人嘅悠閒步伐啦。
