上次講到英國搵工其實唔難，今次就再實際為大家深入介紹幾個大型求職平台，啱晒移民前上去資料搜集，有信心有能力嘅朋友更可以喺香港已經 Send 定 CV，只要你係人才就有機會得到公司賞識，為移民決定打一枝強心針！
【綜合、兼職類】Indeed、Totaljobs、Cvlibrary 如果你無特定專門嘅工作技能，未有清晰嘅求職取向或想先做 Part-time 熟習環境，你可以先到比較大包圍嘅求職網站，了解下不同行業嘅人才需求。做法相當簡單，只需要將你有興趣嘅行業或職位打入搜尋器，就可以得出不同地方嘅空缺。你可以用 Filter 功能篩選地區，或揀選距離你在幾公里內的工作。你亦可以將你嘅 Profile 設定為公開，方便獵頭公司或中介聯絡你。
【金融、會計、保險類】efinancial careers、Cityjobs eFinancialCareers 係從事金融類工作嘅朋友不能錯過嘅求職網站，專營有關會計、金融、保險、法律、銀行、股票市場、Sales、Marketing 等工種招聘，同時更會提供行業最新資訊，相當實用。Cityjobs 則是英國頂尖人才招聘網站，主要涉及銀行、金融、會計、保險與法律方面嘅工作。
【IT類】CWJobs
IT 人才喺世界各地都吃香，英國都唔例外。CWjobs 涵蓋咗不同職位、技術、範疇嘅 IT 工種，你重可以工作地點等搜尋空缺，介面一目了然。
【時尚、設計類】Drapers
倫敦係一個時尚文化之都，時尚類別嘅工作亦不少，如果你有意從事設計、網售、零售、紡織類等，Drapers 就值得你去深入發掘。
【中介類】Hays、Manpower、Carbon60
如果你本來職位比較高階或資深，你可以考慮直接與中介公司聯絡，佢哋會幫你留意適合嘅工作機會。每個行業都會有不同嘅中介公司，你可以善用 LinkedIn 或 Google 搵到你嗰行嘅 Recruitment Agency，例如 Carbon60 就係專門為航空、工程、能量、基建等工種配對合適人材。
最後不得不提 LinkedIn 平台，英國幾乎所有中型以上嘅公司都有註冊，你可以直接使用平台嘅應徵功能，向特定心儀公司投履歷。平時好好管理自己嘅 LinkedIn 帳戶，更新你嘅工作資歷，隨時會有獵頭公司向你介紹工作，一定要好好善用！
